សមត្ថកិច្ចខេត្ដកណ្ដាលមិនយកភ្នែកមើល ល្បែងឆ្នោត កន្ទុយលេខ កំពុងរីកដុះដាលដូចផ្សិត នៅក្រុងតាខ្មៅ
15-February-2016 | ដោយ មែន កំសត់
កណ្តាល ៖ ល្បែងឆ្នោតកន្ទុយលេខនៅក្រុងតាខ្មៅ ខេត្តកណ្តាល កំពុងរីកដុះដាល ដូចផ្សិត រាប់រយកន្លែង ដំណើរការយ៉ាងរលូន ដោយសមត្ថកិច្ចហាក់បីដូចមិនមានការហាមឃាត់ ឫទប់ស្កាត់ឡើយ វាផ្ទុយស្រលះពីអនុសាសន៍ប្រមុខរាជរដ្ឋាភិបាលភូមិ-ឃុំមានសុវត្ថិភាព ។
តាមប្រភពពីប្រជាពលរដ្ឋ បាននិយាយពីមាត់មួយទៅមាត់មួយថា នៅក្រុងតាខ្មៅមានមេកន្ទ្រាញបើកល្បែងចាក់ឆ្នោត កន្ទុយលេខចំនួន៣ នាក់ ទី១ ឈ្មោះ តា ប៊ន ផ្ទះនៅមាត់ទន្លេ ទី២ឈ្មោះ ចែ អៀង នៅផ្លូវរង្វង់មូលលោកតាខ្មៅ និងទី៣ ឈ្មោះ ចែ ហួង ផ្ទះលក់កាហ្វេនៅខាងកើតផ្សារតាខ្មៅចាស់ ពួកគាត់ទាំង៣នាក់ មិនត្រឹមតែបើកចាក់នៅផ្ទះខ្លួនឯងនោះទេ ថែមទាំងបើកសាខាពង្រីកកូនកញ្ជ្រែងម្នាក់ៗរាប់សិបកន្លែងទៀតផង។
ប្រភព បន្តឲ្យដឹងថា ផ្ទះបើកល្បែងឆ្នោតខាងលើនេះ បានដំណើរការច្រើនឆ្នាំមកហើយ ជារៀងរាល់ថ្ងៃ ឃើញក្រុមអ្នកញៀនល្បែងចូលទៅលេងភ្នាល់ចាក់បន្តកន្ទុយគ្នាដូច បុណ្យក្រាលកឋិនអ៊ីចឹង ពិសេសផ្ទះ ចែហួង លក់កាហ្វេខាងលើនេះតែម្តង។ ដោយឡែកមេបើកល្បែងឆ្នោតម្នាក់ៗសុទ្ធតែអះអាងដូចគ្នាថា ការដែលពួកគេហ៊ានបើកលេងជាជំហរនេះ ដោយសារមានទំនាក់ទំនងយ៉ាងស្អិតរមួតជាមួយអាជ្ញាធរមានសមត្ថកិច្ច ពាក់ព័ន្ធគ្រប់លំដាប់ថ្នាក់អស់ហើយ គឺចាប់តាំងពីថ្នាក់ក្រោមរហូតដល់ថ្នាក់លើ ទើបការបើកល្បែងរបស់ពួកគេរកស៊ីមកទល់នឹងសព្វថ្ងៃ។
ប្រជាពលរដ្ឋក៏បាននាំគ្នាលើកឡើងដែរថា តាំងពីមានល្បែងឆ្នោតកន្ទុយលេខកើតមានកាលណាមក នៅក្នុងមូលដ្ឋានរបស់គាត់តែងតែកើតមាននូវបទល្មើសចោរលួចចោរប្លន់ ស្ទើរតែរាល់ថ្ងៃ មិនសូវដែលខាននោះទេ ធ្វើឲ្យប្រជាពលរដ្ឋរស់នៅមានការព្រួយបារម្ភភ័យខ្លាចគ្រប់គ្នា។
ពួកគាត់នាំគ្នាស្នើសូមឲ្យមន្ត្រីមានសមត្ថកិច្ចពាក់ព័ន្ធគ្រប់ លំដាប់ថ្នាក់ ពិសេសលោកអភិបាលក្រុងតាខ្មៅ ដែលទើបឡើងកាន់តំណែងថ្មី មេត្តារៀបចំការងារលុបបំបាត់នូវល្បែងល្មើសច្បាប់នេះផង បើពុំដូច្នោះទេ ពលរដ្ឋរស់នៅក្រុងតាខ្មៅ ប្រាកដជារស់នៅដោយការព្រួយបារម្ភភ័យខ្លាចជាក់ជាមិនខាន៕
ចំនួនអ្នកទស្សនា
- ថ្ងៃនេះ11051
- ម្សិលមិញ15191
- សប្តាហ៍នេះ54201
- ខែនេះ76081
- ឆ្នាំនេះ76081
- សរុប20518537